大概97年，當電訊界鬥到你死我活之際，曾有網絡商推出過$68月費任傾計劃，在當時轟動程度嚟睇，仍未有一項網絡服務夠佢豪爽！但講到「豪」，相信點都唔及PCCW結合埋Sunday之後嘅3G網絡咁激，呢次PCCW3G除宣布正式面世，更推行半年免費試用計劃，每月提供多達6,000或10,000分鐘通話時間任傾，兼出埋部3G手機PlatinumU636畀你上網，完全冇合約或回贈綁死，做到真正「送」畀你，連街坊途人亦大讚今次係史上最豪優惠，重話要搶住試用㖭！
記者：陳國輝 攝影：何家亮
PROFILE
制式：WCDMA/GSM三頻
體積：96.5×50×24.5mm
重量：125g
屏幕：26萬色彩芒
通話時間：150（話音）/60分鐘（視像）
備用時間：220小時
主要功能：130萬像素旋轉鏡頭、視像通話及攝錄、播放短片和音樂、MP3鈴聲、SD卡槽、Java遊戲、藍芽
查詢電話：PCCW（28881888）
呢次試用優惠有幾抵玩？用家連一毫子都唔使畀，只需以新號碼登記即享有3,000基本以及3,000網內分鐘通話時間；而攜號碼者更享有合共10,000分鐘，多到傾斷氣都得！任講之餘，網絡商重出埋3G機畀你用，半年後如果你繼續用呢項服務，重送埋部機畀你！至於瀏覽3G網頁或者視像通話都一律免費，但要留意，如果玩跨台視像通話，仍計算每分鐘$1；下載MP3鈴聲、Java遊戲亦需收費，所以大家咪諗住「試用」，就搏晒命單撈嘢喇！
14條3G頻道晒你冷
試過用手機瀏覽網頁，速度算唔錯，最難得係記者單撈咗幾齣串流式電影睇過，亦未發現有中途暫停或者斷線嘅情況，表現非常穩定；內容方面多達14條頻道，「now寬頻電視」以及「TVB頻道」強攻電視劇為主，就連家庭主婦都啱睇！
now寬頻電視
其實係將電視節目上嘅精選片段搬到手機銀幕，暫時只見「頻道精選」提供片段欣賞，另外重有「HallmarkChannel」、「STARMOVIES」等節目介紹，好詳盡。
TVB頻道
最有新意莫過於「劇集討論區」，你可以隨時發表或回覆意見，唔講重以為係3G版「TVB自由講」㖭！當然亦有其他劇集預告、娛樂資訊及新聞，內容豐富。
環球流動樂場
為環球歌手而設嘅專欄，提供最新歌曲、鈴聲以及MV就唔在講，竟然連太極嘅經典歌《紅色跑車》、《留住我吧》都轉埋做鈴聲，包保唔會同人撞！
林海峰地帶
林狗係PCCW3G代言人，當然唔少得有關佢嘅音樂節目！喺裏面隨時可以欣賞到林狗嘅新歌，以及自錄製好嘅騎呢鈴聲，不過冇得試聽，最失敗！
單撈Java遊戲
暫時只提供「SEGA」、「Funmobile」、「移動玩家」以及「TVB.com」四間公司推出嘅Java遊戲，遊戲開發商及數量都比較少，下載費用約$20，不設試玩。
電盈3G優惠內容
免費項目
．華為3G手機U636
．新客可獲6,000分鐘通話時間
．攜號碼轉台客可獲10,000分鐘通話時間
．無限使用視像通話、網內短訊及MMS
．手機版now寬頻節目
．TVB特設頻道
．來電轉接等增值服務
收費項目
．跨網視像通話、短訊及MMS
．無線寬頻上網
．鈴聲一類3G數據下載
手快有、手慢冇！
PCCW提供24小時網上免費登記，只要大家瀏覽www.pccwmobile.com，然後輸入身份證號碼，咁就搞掂㗎喇！不過，每人只限申請一次，而且必須以信用卡作自動轉帳；至於會接受幾多人申請，以及要等幾耐先得到答覆呢？咁官方則未有詳細公布。截止登記日期為2月10日，總之有興趣試用就要趁快！
街坊點睇？
蕉仔（手機Sales）
淨係個Plan真係好抵，不過機款得一隻冇得揀，太齋喇！
阿樹（學生）
半年唔使錢任玩喎？我平時都用開3,000分鐘，梗係出啦！
余小姐（文員）
我會試吓新網絡好唔好用，而且舊網絡亦會保留番！
130萬鏡頭邊傾邊拍
華為（HUAWEI）喺國內電腦界勁響朵，不過喺本港就好少提到！旗下首部3G機U636採用極「韓」化嘅銀色摺機設計，不過膠質感稍重，手感麻麻，睇落更似LG3G機㖭！中間位加入130萬像素旋轉鏡頭，可以一邊傾視像電話，又可以拍低現場實況，再Send畀對方。屏幕表現亦值得一讚，採用2.2"（26萬色）彩芒，其光度足夠平日喺街或者車上瀏覽3G網頁，就算睇得耐亦唔會眼矇矇。
藍芽插卡傳輸簡單
坊間大部份國產機都唔配藍芽，每次影完相都要經紅外線傳輸，除咗時間耐，距離限制亦相對大！U636啱啱相反，不設紅外線，卻只有藍芽，支援檔案傳輸及藍芽耳機，主要玩法都齊晒；另外，機側更設有隨插即換式SD卡槽，當然最適合用嚟儲存由3G單撈落嚟嘅MV、電影以及Java遊戲；但最可惜跟機唔包記憶卡，僅機內22MB容量好快就用完，既然$0機價出機，就不妨「貼」多幾舊買SD卡啦！
