問心，貪平貪可以喪食先會食自助餐或任點任食；關心，要關心嘅不外乎三樣嘢：價錢、食物同可Hea時間。𠵱家報料，聽清楚，價錢每位$118，食物有鮑魚燕窩同京、川、滬、潮、粵、台等過百款食物，可Hea時間頭搭尾5小時，愈食得多條數計落愈抵，怕醜都係咁話，空定肚入場無衰，飽到上心口就不妨眠一眠唞一唞再喫多轉，一於有咁盡食到佢咁盡！
記者：陳慧茵
攝影：陳智良
模特兒：Carol、Peggy、Lion、Cler（Salvador）
即Check貴價嘢
蠔王生扣 原隻鮑魚
唔失禮，大連鮑魚Size有雞蛋咁大隻，用蠔油、滷水汁及台灣豉油扣，肉汁豐富口感腍而不韌，過關。
燕窩燉雙皮奶
僅熟雙皮奶口感滑溜，奶味濃唔太甜，經仔細驗證，證實足有5両金絲碎燕，都幾足本喎，都過關喇。
最高紀錄2人食57碟
食肆名字叫「常滿」，啱聽又應景，個胃梗要有咁滿質咁滿！滿還滿，食乜先？店舖為吸納後生仔幫襯，所以推出京、川、滬、潮、粵及台過百款冷盤、熱盤及甜品任食任點，最正係每人奉送1隻鮑魚同1盅燕窩雙皮奶，重要任食時間長達5小時，成人每位$118，加埋一同茶芥，擺低$145就可以落樓，單睇價錢好似唔夠吸引，但唔該記住係任食任點，你愈食得多咪愈抵囉。
任點任食每晚6:00pm開始，趕得切時間入座當然最好，8:30pm過後都重望有位，總之星期五六日就預早訂位穩陣，Book位就記得揀近落地玻璃位置，望正人來人往的尖東街頭，有景送飯胃口都好啲嘛。小記親身經驗，同個Friend兩個人食20幾碟左右已經飽到行唔郁，但負責人昌哥就咁話：「最勁見過2個客食咗57碟，直至𠵱家都無人破到呢個紀錄。」57碟咁誇張？唔通係小林尊秘密傳人？
10大回本必食
斷估你唔係小林尊，無可能食到57碟，所以要揀飲擇食，除矜貴食物外，其實菜式的煮法、心機、特色都應該留意，以下從過百款食物中脫穎而出的10大回本必食，會有睇落唔夠貴格的台灣蛋黃肉同西米南瓜露，希望啟發到你咪以貌取人。
1.冷盤拼盤
15種冷盤中，推介必食流沙蛋，溏心蛋黃火候控制得宜，蛋白外層以木及茶葉燒熏過，每晚限量80隻，8:30pm後多數沽清。
2.北京黑醋骨
其貌不揚卻是女生必點菜式，貪其味道夠搶，選用肥鮮腩排，從北京入口的香濃汁料味道近似蘸大閘蟹的醋，帶點荔枝酒香。
3.蘿蔔絲酥餅
棄普通酥皮，外皮改用蘿蔔及秘製麵粉搓成，口感鬆脆帶蘿蔔味，內裏蘿蔔絲軟綿綿，小心燙口。
4.招牌小籠包
真正做到行內所稱的「一體化」，即肉、皮、湯分開，入口似喝熱湯，肉會不知不覺間化開。
5.剁椒魚頭
斬魚頭方法是關鍵，沿鯇魚腦髓位切，令易散的腦髓蒸熟後仍可保留，香、辣、滑口感直灌喉底，我以後吃魚頭只想吃腦髓。
6.台灣蛋黃肉
師傅棄攪拌機改用人手剁豬肉半小時，吃時無筋肉質帶蛋黃香，汁帶果香酒味，口感似蒸肉餅。
7.水煮魚片
四川花椒、子彈椒、重慶辣椒乾及紅油煮8小時，混上湯煮成湯底，夠膽不妨連浸泡後的大豆芽菜同吃，感受何謂麻辣刺激。
8.宮保炒蝦仁
「常滿」的豆瓣醬用四川辣椒乾及大量蒜茸製成，味濃不太辣，加台灣豉油炒腰果及河蝦，口感不俗。
9.台式三杯雞
新鮮香料百里香放入砂鍋，再放用台式油膏煮成的雞件，白煙冒起香味四溢。
10.西米金瓜露
回本在煲足4小時，特意選用內地南瓜，質地較粉，食時可嘗到絲絲南瓜肉，口感Creamy。
食客有Say
常滿21511186
地址：尖東科學館道14號新文華中心1樓147號舖
營業時間：11:00am-11:30pm
供應時間：星期一至日6:00pm-11:00pm
收費：成人$118；小童$78，另收加一茶芥
