年近歲晚，又係零售旺季，各大商舖都出奇謀爭客，好似崇光（Sogo）就搞咗個日本雕刻展，出動埋老闆鄭裕彤、大細劉，同埋日本領事北村隆則去剪綵，咁重磅嘅嘉賓，唔單止吸引近百個記者，連小提琴家西崎崇子都嚟埋，超人李嘉誠雖則人唔到，都特登送個花籃嚟。
由於個展場比較細，人又多，彤叔由大細劉陪同到場，即時引起一陣混亂，到正式剪綵時，啲價值幾十萬嘅展品同個台距離好近，又無遮無掩，剪完綵佢哋重要喺場內行一轉，睇吓嘢，令到在場嘅「實Q」鬼咁頭痕，唔知護住展品定係為老細開路好，惟有不斷大叫「小心」！
彤叔同華華講，過年唔會四圍去喇，會留喺香港唞吓。而成晚傍住彤叔嘅大劉就冇乜嘢講。
講番個雕刻展，29件展品都係出自日本藝術家籔內佐斗司，最平嘅售4千蚊，最貴嗰件就賣成118萬，展品嘅總值超過700萬元，今日起至17號喺崇光16樓展出，想睇就行快步啦！
李華華