過咗年，最大新聞就係乜都升，狗年將至（二月四日立春），雞狗交接期間，雞犬皆升，就只係睇你敢唔敢入市。聯儲局權傾天下，十一月份會議紀錄講話：「加息次數可能不會多，」咁就全世界㷫晒，股市升，地產升，黃金升，貨品升，外滙升，好彩聯儲局班委員，個個行得正，企得正，唔埋怨薪水低過我哋任總裁好多，更冇內幕交易，呢班人係真君子。
呢排睇期貨市場，除咗石油黃金多人注意之外，原來米、糖、咖啡都升，呢類貨品會影響民眾生活，唔好睇小。譬如泰國現在缺糖，泰國政府從來都管制糖價，適逢蔗糖失收，糖價急升，糖農、糖商在泰國賣糖，每公斤十三點五銖，緬甸價係二十四銖，柬埔寨賣十六點二銖，寮國賣十五點六銖，於是走私糖成為大生意。泰國下令嚴打走私，嚴禁屯積蔗糖，糖農聯合高調抗議：「以前一噸糖可以換到一噸米，現在只換到三分一嘅米，糖農有權善價而沽。」
凡有價格管制，就容易出現走私。啲NGO應該去泰國示威、抗議泰國糖農受到政府迫害，樂施會怕要出聲支持啩？倫敦三月期糖升到近三百六十美元一噸，比一年前升咗38%，紐約白糖期貨價就升到十五年新高，每磅十五美仙。泰國係世界第二大蔗糖出口國，國內超級市場竟然要分配白糖嚟賣，就因為他信政府驚通貨膨脹，拚命㩒住糖價唔准升之故。
商品期貨市道係一個指標，通脹威脅已經重臨，大家唔好咁快以為利息見頂，觀察到貝南克在狗年接任聯儲局主席之後有乜動作都唔遲，唔好咁容易就爭住接貨，除非你呢一排喺股市賺到唔少啦。香港好似冇乜糖股，只有兩隻金股（紫金、靈寶），否則嘅話，炒期糖風險太高，買番啲糖業股（sugarstocks）今年會有着數。