特首搬屋，當然係好大件事，八方聽聞，佢老哥同曾太左揀右揀，最後都係聽吓老人言，提前喺今日喬遷，由山頂白加道搬落山下嘅上亞厘畢道禮賓府。
錦鯉一箱箱運到新居
睇吓日曆，今日係陰曆十二月十三，屬中吉之日，咁梗係好過星期六歲破凶日，或者黑色星期五啦。其實煲呔幾時搬，睇佢啲心愛風水錦鯉幾時過新塘就知道，噚日大清早，啲錦鯉就一箱一箱運到去新居，適應吓新環境。禮賓府噚晚亦燈火通明，搬運公司不停出出入入搬箱落貨。所謂上屋搬下屋，唔見一籮穀，重唔捨得舊環境。咁煲呔夫婦喺維多利亞宮又的確有好多先苦後甜嘅回憶。
煲呔威就威喺呢度，真係前冇古人，有邊個住過晒財司、政務司同特首官邸？所以佢噚晚午夜思量，當日如果唔係陳四萬打退堂鼓，佢點會咁順利做咗維宮主人？而如果唔係老董將佢打入冷宮，佢點會練得一手好高球之外，重明白卧薪嘗膽嘅大道理？
卧薪嘗膽成就霸業
退一步海闊天空，當年喺維宮睇電視見到五十萬人上街，煲呔曾經忍唔住喊起嚟，幾乎想唔撈咁話，點知世事難料，大遊行竟然成就佢嘅春秋霸業，今日輪到自己坐正，雖然都有二十幾萬人走出嚟，搞到曾慶紅喺海外都話遺憾，但有大屋住有錦鯉陪，光宗耀祖驕親傲友，話之你班泛民主派日日遊行啦。
煲呔咁叻仔，其實早知呢個位唔易做，淨係識迎合北京喜好，好似當年湊英國佬一樣行唔通，因為英國係西方文明發達國家，祖國同人哋冇得比，但係難做都要做，權力呢味嘢，有邊個放得低呢，你話呢間大屋風水唔好，畀中銀劈到正，咁你有冇得住？
所以八方都好服煲呔夠膽識，老董唔敢入住前港督府佢老哥就敢，不過，重有一樣佢應該要做埋，就係改番個正確嘅名。必也正名乎，名不正則言不順，當年振英哥哋搞個改名大會，無端端將GovernmentHouse嘅中文名由港督府改咗做禮賓府（差啲叫咗做紫廬），而家煲呔搬返去住同辦公，冇理由重叫禮賓府啫。
不過，當局就話佢哋暫時冇意改名，唔知係咪怕叫番做「特首府」，意味做特首會好苦？咁可以叫特首府邸，香港個首長住喺禮賓府，賓賓聲，咁個「主」去咗邊？
傳真︰2623-9278
電郵︰[email protected]