張藝謀早前話喺二月會開拍新戲《秋日的回憶》，不過𠵱家就改名叫《滿城盡帶黃金甲》，新嘅片名原來係嚟自唐末聚眾作亂嘅黃巢詩作《不第後賦菊》，寓意刀光劍影嘅史詩式戰爭場面，演員方面就有張藝謀嘅舊女友鞏俐同埋周潤發。
大規模戰爭不可缺
據製片張偉平透露，片名雖然引用咗黃巢嘅詩句，但內容就絕對同黃巢之亂無關，他重透露呢部戲係講述唐代嘅故事，以皇帝、皇后同將軍作為片中三個核心人物，所以宮廷鬥爭同戰爭都係唔可以缺少嘅場景。
問張偉平嗰三位人物會唔會係指唐太宗、李靖同紅拂女？但張偉平則話暫時唔可以透露，只係可以話套戲嘅規模會大過《英雄》。
《滿城盡帶黃金甲》二月會喺重慶武隆開拍，至於鞏俐的亞洲宣傳代言人李燕燕表示，鞏俐𠵱家喺布拉格拍緊《沉默的羔羊前傳》（YoungHannibal:BehindtheMask），但佢𠵱家睇緊《滿》嘅劇本，二月拍完後會返去內地同張藝謀傾吓，相信合作嘅機會好大喎。
