原來教師自殺，每年一月與九月是高危日子。高危是紅色警報，不代表閒日沒有意外，防人之心不可無，防人求死，難度更高。家家學校有本難念的經，師生各自有他們「不求人」的理由，只希望自殺不會像流感，在校園人傳人散播，搞到要封校休課隔離。不過照目前情況睇，校園自殺風氣，來得兇猛，原因不詳，有點似沙士，屬於非典型，社區一定要警覺，專家要伸出援手，當校園是暴瀉的股市，「救市」行動，宜早不宜遲。
近年「師」級專業人士的自殺機率頗高，再自殘下去，本地薑早晚遭內地精英淘汰。香港死亡率跟出生率各走極端，自殺者多屬青壯一族，留低白頭人哭黑頭人，老人還要「復出」照顧遺孤，老人和青年自然問題多多，政府不能坐視。
除了教師屬高危類別，其他「師」的「指標」如何？我八卦諗，理髮師應該屬於低風險，煩惱絲盡去，清爽照人，心情甚靚。醫師相反，能醫不自醫，最好盡快讓朋友照照肺，scan一下心事，病向淺中醫。律師前景大好，A45關注組歡迎你加入，事無巨細，監督政府，邊度得閒死。國師處境甚尷尬，曾特首是番書仔，唔會畀面這種老八股，再唔執生轉型，肯定屈住肚氣，日日搵樓跳。大法師就唔同，打着傘去迪士尼，排個把小時隊，玩完那個飛越太空山，即時悟道，悲欣交集。論過癮，大法師還是輸給魔法師，魔法師一變，五號報告書就由一水護田變成一褲都係。
噢，你問魔法師是誰？是不是等同巫師？係唔係影射陳四萬是巫婆……唔，選特區最高調的師級人馬，要數近日落重手（催淚氣加布袋彈）煮韓國農民菜、渾身殺氣的「阿一」廚師！