Hea：《鋼鍊》導演死都唔爆結局

舊年二月無記開始播《鋼鍊》（《鋼之鍊金術師》），開頭都好雄心壯志同個個禮拜都坐定定喺個電視前面追。不過喺漫畫節買咗DVD，一氣呵成睇晒51集，睇到尾至知，原來結局搬上大銀幕，今日就有得睇。趁住電影導演水島精二嚟咗香港，梗係要先問問個結局係點啦。
記者：梁學文　
攝影：楊錦文

《鋼鍊》殺入旺角

有人鍾意《鋼鍊》鍾意到要着埋戲中主角個啲衫，扮埋主角兩兄弟嘅招牌動作行街。為咗證明《鋼鍊》係咪真係咁多人識，於是就帶埋幾個重要角色Cosplayer殺入旺角行人專用區，睇吓有無人認唔到佢哋係邊個，同埋問吓班Fans期待個結局係點。測試結果：途人見到佢哋，都指指點點：「嘩！愛德華喎！重有細佬㖭。」而且個個都識做兩兄弟嘅招牌鍊成動作，就證明鋼鍊真係好多人識，而最受歡迎嘅角色係愛德華。

撐場性感女

導演孤寒

導演水島先生大賣關子唔肯講結局：「對唔住！想知道結局梗係要入場睇套戲啦，唔可以講你哋知住，不過我就可以話你哋知個結局係一個幾圓滿嘅結束。」唔係吓話，導演你咁孤寒，講多兩句都唔怕啦，「其實個結局就貫徹咗《鋼鍊》嘅主題，有得就必有失，表面睇好似好HappyEnding，不過其實失去嘅都唔少，講住咁多先啦，其他你入場睇就知。」

■導演水島精二

新角色登場

唔肯講結局，不如講吓電影入面嘅角色，水島就話：「今次劇場版有幾個新角色，入面最關鍵就係挪亞。挪亞呢個女仔係吉卜賽人，亦係一個流浪者，同愛德華好相似，都係生活喺一個世界入面，但係又諗住第二度，喺戲入面都幾重要。」果真有點身在曹營心在漢嘅感覺。今次電影版入面重有個角色都唔可以唔識，就係亞爾凡斯。亞爾凡斯係愛德華喺現實世界入面嘅朋友，從事火箭研究，喺電影結局入面愛德華都要借住佢嘅火箭至返到去鍊金術世界。而亞爾凡斯嘅出現，令愛德華明白到自己跟世界嘅關係，唔可以再冷漠不問。呢個亦都係導演製作今次劇場版，想帶出嘅信息。

■電視版結尾講到愛德華同艾爾因為爆炸狂人金布里而分開咗喺兩個唔同嘅世界。

■兄弟二人同心保護世界。

日本首相都要入場睇

今次劇場版入面除咗兩兄弟嘅結局之外，其實重想表達人同呢個世界嘅關係，唔好太過個人主義、要關心多啲身邊嘅人同事。另外就係反戰爭，套戲以世界大戰做時代背景，目的都係想講戰爭的禍患。「其實套戲同現實幾相似，好似近來嘅戰爭呀，小泉又成日被人批評，我都係想多啲人去關心世界。」水島先生認真咁講。希望小泉有入場睇，睇完唔該用心諗諗啦！