港股高位徘徊，散戶繼續追落後。建築股中國建築（3311）噚日被踢高7%至2.30元，成交946萬元。原來有消息話CEPA第三階段會放寬本港建築業進軍內地市場。有位楊生話，先前基金炒起國內房地產股，現時呢類股份開始回軟整固，芬佬轉為炒內地建築股。
不過阿虎翻查資料，中國建築主要在本港從事建築及土木工程業務，所以話芬佬炒完內地房地產股，順便炒埋內地建築股的說法並不成立。至於CEPA放寬香港建築業進軍內地，中國建築的處境就相當尷尬，若其進軍內地，將與大股東中建總有業務競爭之嫌。
佳邦毋須睇太淡
台資公司友佳國際（2398）噚日新上市，股價曾升至1.26元，收報1.23元，較招股價高8.9%，總算對股民有交代。友佳表現並未受到同屬台資的佳邦（471）上市僅三個月便發盈警的消息影響。佳邦噚日亦告企穩，收報0.65元，升1.56%。
i師傅話，佳邦發出05年度盈警，只是因為客戶推遲落單，基本因素冇變，聽講有關客戶已經繼續落單，所以毋須過於睇淡。
地鐵（066）噚日勁升4.22%至16.05元，成交達4.42億元。阿虎少搭地鐵，據聞地鐵在中環香港站擺咗棵巨型桃花，睇嚟有助地鐵運氣。噚日立法會通過促請港府盡快建南港島線，而兩鐵合併就快會有眉目，加上客運量節節上升，旗下商場又話要加租，地鐵有不少利好消息湧現，確是一隻值得追落後的藍籌股。
同樣屬於鐵路股，廣深鐵路（525）卻跌5.35%至2.65元。早前炒春運期間鐵路加票價15%，廣深鐵路的股價由2.20元炒上2.80元，累計升幅27.27%，似乎有啲炒過龍。
創科（669）有機構投資者以每股18-18.4元配售3465萬股，套現逾6億元，規模雖說唔算大，但據聞市場反應唔太理想。近期大市上升，創科郁得唔多，睇嚟投資者要追落後亦未必揀到佢。
阿虎