飲茶時候，與賓架Ｌ講完南加大對德州大學嘅波經，到律師Ｗ講租金苦經。佢間寫字樓喺九六年搬去甲級商廈，租金六十二元，後來經濟不景，租金下調至二十五元一呎。今年業主話經濟好景，重唔本利歸還？要加租到六十三蚊，重貴過九六年。左丁山話：「都係還原基本步啫，唔怕喇！」律師Ｗ話：「你講笑呀，九六年時做一單契，萬萬聲，今年做同樣一單銀碼嘅契，只係千千聲，想話開張十幾萬銀嘅單，冇咁易，故此九六年畀得起租，今年畀唔起！」
據律師Ｗ講，呢間甲級商廈，雖然唔怕冇租客，但仍然有唔少小型單位空置咗，中小企實在負擔唔起咁貴租。今時今日，只有大業主有議價能力，可以猛咁加租，啲租戶就好難為自己嘅產品或服務提價，就算提到，都只係頂多兩三成，邊可以加兩三倍呀。譬如啲顧問公司，做大項目一定要招標，中得到嘅合約，唔慌有好價錢。賣產品嘅，加價三兩成，想冇咗個市場呀？只有甲級商廈大業主與旺區地舖業主可以飛擒大咬。律師Ｗ話：「唉，九七前我哋唔怕畀高租金、高工資，因為我都可以收高價；回歸八年，前七年冇啖好食，一味減價，現在好難收番高價錢，所以畀唔起高租金、高工資。」既然係咁，等啲投資銀行（外資）租晒甲級商廈佢囉。
甲級商廈目前咁值租，點解冇人計劃在中環興建甲級寫字樓呢？中環街市就冇得彈啦！位置適中，可與恒生銀行、中環中心、半山行人電梯用天橋連接，與交易廣場、國金一帶連成黃金腰帶區，點解冇人申請勾地呢？（地政總署署長劉勵超話自去年九月至去年底冇收到勾地申請。）唔通大地產商唔係咁睇好後市，驚住高價勾，高價買入，幾年後大廈落成就會碰上租金回落？以此觀之，大家都只係睇兩年租約期，冇長線睇好嘅勇氣。與律師Ｗ拜拜之後，喺大道中碰到外國地產基金要員Ｃ，問佢地產市道點睇，佢猛話：「我哋賣咗幢豪宅，賣得好好！」