煲呔公關技巧一流，噚日天氣凍凍哋，戴番條紅噹噹飛龍頸巾接請願信（圖），乘機宣傳吓，而每年嘅新年同聖誕，佢更會親手寫賀卡畀各方友好，扮到好有誠意咁。
煲呔寫卡都有分親疏，好似工聯會立法會三子，王國興、嫻姐同鄺大狀都各有不同「待遇」。平時聲大大、最鍾意爆料嘅王國興，被煲呔尊稱為「國興兄」，下款為「弟蔭權」，擺明受煲呔高度重視，否則又點會以兄弟相稱？尤其佢明明細過煲呔，但就做到兄，真係得煲呔歡心。
煲呔最鍾意冧嫻姐，所以好親切咁尊稱佢做「嫻姊」，下款就寫上「曾蔭權」，可能觸及女人年齡，煲呔都費事謙稱自己係細佬啦。
到鄺大狀喇，一睇就知佢同煲呔交情麻麻，事關煲呔喺抬頭，寫上「鄺志堅議員」五隻字，下款就寫上全名「曾蔭權」，同王國興、嫻姐真係冇得比。鄺大狀對此好從容，重讚煲呔「如實報道」，因為佢哋真係唔熟，費事扮親切啦。
凌樹輝攝
爆料熱線：29290000、27860099
報料傳真：26239278
報料電郵：[email protected]