羅家英和徐小鳳近日合作拍攝新片《最愛女人購物狂》，扮演一對新人。飾演新郎的家英哥大讚自己與新娘子小鳳姐外形和年紀上都襯到絕，拍攝期間他更不時狂昅小鳳姐的黃蜂腰。
羅家英和徐小鳳日前穿上結婚禮服拍攝《最愛女人購物狂》，並接受賓客的祝賀，二人還交換戒指。
據知這場戲在凌晨時分拍攝，故一眾演員都要捱眼瞓演出，家英哥大讚首次合作的小鳳姐很專業，他說：「佢好和藹可親，我哋合作得好開心。」家英哥表示接拍這場戲前已向女友汪明荃申報，問他為何沒有親吻新娘的戲份，家英哥說：「一切係導演嘅安排，我都唔知，不過如果要拍咀戲，我都要同阿姐（汪明荃）講。」
與阿姐日本避年
一向口甜舌滑的家英哥又不忘大擦小鳳姐鞋，他說：「我覺得呢個新娘子同我好襯，話唔定導演一早搵咗小鳳姐做新娘，然後先搵我去襯佢，我同小鳳姐都咁上下年紀，梗係襯。」家英哥亦很留意小鳳姐的身段，並說：「因為佢嘅黃蜂腰好有名，所以我一直有留意。」
家英哥已計劃年初二與阿姐出發到日本九州旅行，過一個溫馨新年，談到他的身體狀況，家英哥說：「我keep住六個禮拜去檢查一次，醫生話進展得好理想。」
此外，韋家輝昨日在尖沙嘴宣傳《最》片，他表示喜歡購物的張柏芝最懂得如何去捕捉角色需要，而柏芝除拿出私家名牌拍戲外，還親自去所有名店取購物袋。
採訪：比華利