香港警方處理世貿示威者嘅手法引起爭議，但大部份市民對前線人員嘅表現均表認同，而一直同警方關係好好嘅保安局前局長葉劉淑儀事後亦即刻send個電郵畀警隊一哥李明逵，讚揚佢哋。警方都好畀面，喺今日出版嘅警隊內部刊物《警聲》，用頭版報道葉劉同各方友好對警方嘅讚揚。
葉劉話，警隊喺處理示威場面同示威者粗暴衝擊時表現忍耐、克制、專業同果斷，重話「警隊的表現，本港可引以為榮。」除咗葉劉，警隊前一哥許淇安、保安局局長李少光、泰國駐港領事都力撐警方專業。
其實今次世貿會議期間，警隊亦有好多不為人知嘅花絮，好似喺指揮中心內，原來有兩隻熊仔係現場指揮官孔百德嘅吉祥物；而世貿期間有啲高層不斷向下屬送上蛋糕、糖水，令部份前線人員體重驟增四磅，可以講係意想不到嘅後遺症；重有兩名警務人員喺衝突中遺失警帽，幸好有熱心市民送返警署。
爆料熱線：29290000、27860099
報料傳真：26239278
報料電郵：[email protected]