鄧穎芝（Vangie）高呼：「我最鍾意食公司意粉。」咪諗錯，話晒係藝人，梗唔推介××茶餐廳用火腿、香腸、煙肉、雞翼加茄汁是但炒埋一碟的所謂公司意粉。佢蒲開嗰間Cafe，食開嘅嗰碟公司意粉，雖然同樣係炒埋一碟，但就有齊18種配料，味道好賣相靚大而有當，絕對唔會辜負「公司」呢兩個字。
Union公司意粉$58
Vangie：「意粉加入大量蔬菜，只有小量煙肉碎同銀魚柳調味，夠晒清新健康，好啱成日掛住食肉嘅我清清腸胃。」
老闆愛玩燈
睇番個場，發覺裝修布置都幾得，優點夠開揚，又闢一部份做露台，甚至連燈飾都好花思，老闆阿偉話：「我想營造一間溫室Cafe，所以用花做裝修主題，牆係特別訂做嘅「花牆」，啲燈飾就喺天后一間專賣二手家具店入貨，燈上花紋全部由我哋自己加工上去，希望全店有一個「花」之家嘅感覺。」
Union：旺中帶靜最好Hea
Union開業1個月，優閒Cafe昏暗燈光，襯托露台對出的時代廣場夜景，正中旺中帶靜。旺中帶靜有乜好？好Hea囉！Vangie話：「呢間係新分店，燈光柔和，啱晒大班朋友傾偈，一睇裝修就知老闆花咗好多心思，地方開揚又可以望到時代廣場，非一般上樓Cafe格局……覺得最搞鬼係個露台囉，一幢大廈無端端多咗個木製大露台，玩開放式露天座位，無遮無掩落雨咪整濕晒囉？」老闆阿偉表示由於新舖趕住開業，加上又未到雨季，所以露台帳篷還未安裝，遲些安裝好了，欣賞銅鑼灣雨景就重正。「我最鍾意食意大利菜，特別係粉類，以前去Cafe頂籠飲一兩杯Drink，Union就可以食埋嘢，我係熟客，所以今次推介嘅特色公司意粉都係特別為我而創，老闆知我大食嘛！」
香草燒春雞$98
香草均勻沾上鮮春雞，入口有淡淡香味，可調和燒雞時的煙熏味，配韭菜花夠醒胃。（跟沙津、湯及飲品）
銀鱈魚龍蝦汁配意大利飯$108
廚師先用橄欖油撈意大利特選米，令飯粒更有咬口，加上鮮味龍蝦汁淋上飯面，好滋味。（跟沙津、湯及飲品）
朱古力火鍋配鮮雜果$5
份量不多，不過鮮果沾朱古力食幾件已經好飽肚，鮮草莓、蜜瓜時令鮮果保證新鮮。
Union（28380486）
地址：銅鑼灣羅素街50號德發大廈3樓
營業時間：2:00pm-2:00am
座位：25個
SodaCafe：玻璃窗俯瞰街景
Vangie推介的另一好Hea之地叫「SodaCafe」，成間Cafe好有60年代Feel：「鍾意呢度嘅環境，同樣開喺4樓，可以俯瞰銅鑼灣繁忙街景，重有埋獨立房間，啱晒我哋Artist過嚟飲嘢，清靜都係一個優點，無無聊聊一個人上嚟Enjoy吓都唔錯喇。」
牛油果三文魚扁意大利粉$55
麵條入味但沖淡煙三文魚味道，整體不錯但後者反變成配菜。
意大利油醋海鮮沙律$48
大蝦、魚柳、魷魚、青口等配料份量十足，意大利油醋比一般橄欖油多一份酸味，與海鮮的甜好配合。
焗意大利蘑菇雲吞$55
Vangie：「好正，入面有芝士同忌廉汁，啱晒我口味，重有焗薯茸伴碟，一個人一定食唔晒，啱晒情侶二人用。」
SodaCafe（28816981）
地址：銅鑼灣怡和街2-6號英光大廈4樓
座位：80個
營業時間：星期一至四12:30pm-12:00mn，星期五六12:30pm-2:00am，星期日3:00pm-12:00mn