噚日先喺馬來西亞公幹返港的馬時亨，落機無耐就去咗證監個辦事處，因為證監推廣投資者教育，有個儀式請佢做主禮嘉賓，馬局長到場後一見人就講個市創新高，又話成交額好好，笑到見牙唔見眼，睇嚟佢嘅心情同香港股市掛鈎，唔係話佢揸重貨，只係股市好、局長好啫。
馬局長喺典禮上除咗致辭，同埋為新推出嘅投資者教育標誌揭幕以外，又代表證監做歡樂先生（好彩局長唔係小姐），即場派發小樹苗擺設（圖二）畀嘉賓同傳媒，華華都係其中一個受惠者，不過呢棵小樹苗種唔大，一定冇得朝種樹晚𠝹板。
講番證監會，佢哋今年會用「投資要三思，問清楚好啲！」做教育投資者嘅口號，會有電視廣告同埋網上短片做推廣，廣告主角仍舊係98年嘅「羊太」，但經過咁多年教育，隻羊唔再係只識「咩咩聲」，而係開始識問嘢，想睇就今日開始留意電視啦，重可以去www.investED.hk瀏覽。各位小股民，個市雖然旺，但都要做功課，唔係好易變大鱷點心。
程志遠攝