賽車遊戲最為玩家熟悉，除咗《GT》外，《SEGARALLY》亦係數一數二嘅名作，特別之處，係着重玩家甩尾技術，片住入彎嘅技巧，最新一集《SEGARALLY2006》繼承呢個傳統外，重加入特設「CAREER」模式，玩家可以一嘗由業餘晉身成為職業車手嘅滋味！
記者：許福合
PROFILE
遊戲類型：越野賽車
對應機種：PS2
遊玩人數：1人
開發商：SEGA
行貨售價：$368
查詢：CAPCOMAsia（23661001）
《SEGARALLY》喺好多主機、街機都出過，代代都有唔少Fans捧場，今次《SEGARALLY2006》重會隨碟跟多隻《SEGARALLY1995》復刻版，相信唔少機迷都曾經煲過，當玩過新作後，再換碟玩番原作，特別有味道！
超多賽道玩到手軟
同樣賽車遊戲，相信唔少人都會將《SEGARALLY2006》同《GT4》比較，若以賽道嘅數量相比，絕對係《RALLY》贏出一條街，可以選擇嘅賽道多達250條，雖則有部份會係相反賽道，但玩家嘅選擇就比較多，不過今集明顯係將賽道分割成多段作賽，大概跑1分鐘左右就完，玩落就覺得短咗啲，有時連同場比賽嘅對手都未見到就跑完，賽道太短玩落唔夠喉之餘，重覺得好唔暢快，無咗追前車嗰種緊張感，只係同時間比賽！而畫面亦係比較令人失望，雖然Rally都係跑山路多，但一來畫面變化唔多，若拿來同《GT4》比較，更係輸一班，比較值得一提係路面指示新增彎度幅度顯示，片彎就唔使估估吓。
甩尾幅度成關鍵
不過Rally賽車始終與一般賽車唔同，唔太着重速度感，更為留意控車技巧，甩尾時機，繼承咁多代版本，《SEGARALLY2006》控車方面其實已相當完美，若與《GT4》越野賽道比較，操控性就更佳，可讓玩家享受片住過彎嘅快感！Rally基本要注意係如何入彎而不影響速度，入彎前要留意睇睇彎度大小，若果只係1、2級，只要輕輕將車擺斜，放一下油門，就可片住過彎，對急彎就可能要提早動作，時機要掌握得好。過彎時相當着重控車技巧，筆者就提議用Joystick嚟玩，感覺比十字掣微調方面更為優勝，而且要將車修正亦比較容易。若將新版同附送95年版比較，舊版明顯易玩得多，賽車無咁易失控，賽道亦較長，不過講到真實感同有特色，重係新版好。
買Parts調校愛車
除咗機迷玩開嘅街機模式，值得注意係家用版所特設嘅CAREER模式，玩家可以為自己安排比賽日程，一開始將由業餘車手做起，並且只有5架車可以選擇，對汽車有認識的話重可以玩埋改車，調校心水跑車出賽，當在賽事勝出，就可以拎住獎金去買零件甚至換新車，打響名堂後，更可能吸引到贊助商提供資金，只要保持成績，財源就會滾滾來！另外街機模式分別唔大，另加上可自己選擇賽道嘅TimeAttack，只要開過嘅賽道都可以玩番，不過最奇怪係竟然無VS對戰，無得同朋友連車，真係少咗唔少樂趣。
