天寒地凍，對我哋啲老人家嚟講特別難頂。真係屋企少咗部暖爐都會隨時冇命。
講開凍，我阿利呢行會計都有少少沾寒沾凍。大家睇報紙話我哋點好點好，又話加人工幾多幾多，實情香港有成幾萬個會計師，又點會個個都發到豬頭咁。如果係，我都唔畀個仔做電腦，一於迫佢繼承我衣缽。
自己掛牌執業好淒涼
究竟邊啲會計師捱凍？應該係嗰啲自己掛牌執業嘅行家，佢哋真係捱到十隻手指頭倔晒，都重係掹掹緊，咪話唔淒涼。
點解？一匹布咁長。啲客仔鍊價唔在講，自從早幾年經濟環境差，萬廢待興，樣樣都話減價之時，行家個個都要削價留客。到𠵱家經濟好轉，唔好以為可以加番價，正所謂東家唔簽簽西家，為求爭客，劈價在所難免。
不過，就算𠵱家有客都未必敢接，冇人做嘢是也。家陣大行搶中行啲人，中行搶細行啲人。細行？冇人。就算你識飛，長袖善舞，諗住發圍，但望一望間會計師行，得嗰三四個人做嘢，有兩個重月底辭職轉工，你話頭唔頭痕？
外憂內患之餘，重有結構性改變。𠵱家啲有限公司已經從以前最少兩個人，變成一條友都得。跟住嗰啲細公司又可以用份細GAAP，唔使用份煩嘢。整整吓，分分鐘嗰啲一人公司可以唔使核數。如果真係，到時啲自己掛牌嘅行家就真係食西北風。好似我呢啲年紀嘅，都賺落一筆，可以慢慢搣。後生嗰啲就慘喇，有排未見岸。
所以話，行行都有辛酸史，咪睇見報紙就以為呢行好發。我阿利就醒，打死都唔畀個仔入行。