近排有傳徐濠縈已懷第二胎，所以向男友陳奕迅（Eason）迫婚成功，將於三月拉埋天窗，前晚徐濠縈同幾位老友包括莫文蔚、梁漢文同圈外女友喺跑馬地彭慶記食家開飯，唔知係咪同班姊妹傾吓結婚大計呢？可能係人逢喜事精神爽，悉心打扮嘅Eason嫂明顯比前飽滿同容光煥發，重披咗件fur出街，打扮確係幾有阿太feel。
梁漢文埋單
前晚Eason雖然冇出現，但徐濠縈依然心情唔錯，同成班朋友有講有笑，六個人竟然食咗成十碟餸，直到夜晚近十點至一齊離場，而呢餐飯就由全場唯一嘅男士梁漢文負責埋單請客。
徐濠縈前晚約晒成班姊妹兵團開飯，自然令人聯想到可能係開會傾擺酒，但佢噚日就同馮仁昭講：「低能咩？梗係唔係，成班朋友食吓飯咋。」佢話自己一定會結婚，但唔會特別宣布，亦唔想大搞，想知佢結咗婚未，就只得一個方法，佢話：「有一日，見我同Eason都有戒指咪結咗囉！」
另一方面，Eason會喺下月開演唱會，佢特別邀請德國三大交響樂團之一嘅漢堡交響樂團到場演奏，到時樂團重會帶定過千萬嘅樂器來港㖭。
