45條關注組嘅梁家傑真係越嚟越貼近民生，佢剛就西九交咗報告，今日又喺立法會提出口頭質詢，問咩呢，竟然係男女廁所喺公共場所嘅新比例規定有何依據？
呢個問題以前係白鴿黨羅致光嘅至愛，當年佢老哥因為成日要等個女排隊去廁所，所以一再去信民政局要求起多啲女廁，估唔到羅致光返咗大學教書，佢廁所專員個位由傑哥接上。
咁關注組冇規定只係關注《基本法》第23條同第45條嘅，傑哥可能同羅致光一樣，成日要等太太同囡囡，所以要問孫公，新嘅一比一點二五（男水廁同女水廁）比例係基於乜嘢準則定出；有冇諮詢過公眾，如果有，諮詢過邊個，冇又點解唔做；最後就要知道新規定落實成點？
嘩，使唔使出到大狀上庭口脗去問廁所問題呀？雖然八方都覺得商場、戲院以及酒樓嘅女廁的確唔多夠，特別係聽演唱會，十五分鐘小休時間啲女士用晒嚟排隊，真係好掃興。
爆料熱線：29290000、27860099
報料傳真：26239278
報料電郵：[email protected]