響得朵叫肥平，梗要識捐窿捐罅搵好嘢食先照得起個名，話說某日行北角，發現咗呢間豆腐膶咁細嘅甜品舖「甜姨姨」，睇舖名以為老闆一定係阿姨級人馬，點知係個靚姐姐Candy，我第一時間貢入去喇，天寒地凍都叫咗杯特濃朱古力曲奇飛雪，唔夠喉再整多個豆腐雪糕芒果布甸，味道唔錯，好有HomemadeFeel，果然係私房甜品！望吓餐牌，見重有老婆湯圓、老公湯圓，擺明食「阿旺」水尾，我一支公無試到，但係見到陳豪、郭晉安都同老闆娘合照，相信出品都有番咁上下料子，撐得過。
甜姨姨私房甜品（25086962）
地址：天后電器道96號A4地舖
肥平：乜都放入口，最叻搵平嘢食，搞到肚腩大過佢個頭。