今日中環最熱門話題，就係《信報》賣盤嘅消息。不過正所謂春江水暖鴨先知，報紙市場有幾惡搞，點都唔到中環友扮專家。當然來者用心亦唔係我哋呢啲尋常百姓可以理解得到！欲知後事如何，就惟有等下回分解。
利世民聽完班中環友嘅言論，覺得佢哋當正《信報》係曼聯，而小小超就係MalcolmGlazer。可以肯定一樣嘢，就係林老先生同曹老前輩兩位嘅招牌，一定至少同信報嘅招牌一樣咁值錢。如果只係買《信報》又唔買埋呢兩位前輩，咁就同買曼聯唔要費格遜一樣，捉到鹿唔識脫角也。
中環友講嚟講去，都離唔開媒體老闆嘅政治立場同私人利益。利世民無咁好氣同佢哋討論呢一個問題，因為去到最後，呢啲杞人憂天嘅諗法都係自己嚇自己居多。
讀者先係老闆
中環友自視高人一等，視其他讀者無腦乎？如果有人違背市場原則，講埋的唔三唔四嘅嘢，好快就會畀讀者離棄。當然，有報紙真係完全唔計較賺唔賺錢，不過事實係佢哋又唔係好多讀者。中環友係唔係諗得太多呢？講到底，讀者先至係一份報紙嘅真正老闆，
其實報紙又神奇又神聖。以今時今日互聯網嘅普及，報紙重有生存空間確係神奇。利世民覺得市民買報紙，除咗想睇新聞之外，最緊要係買記者同編輯嘅專業操守同眼光，呢樣就係報紙神聖之處，唔係一般網站可以一時三刻建立得到。辦報紙要唔少投資，係一種承擔，亦係報紙公信力嘅一種來源。重有一點就係，讀者買一份報紙，其實係支持緊一把講佢哋心底話嘅聲音。
反而利世民最擔心者，係報紙難搵錢。前輩遲唔賣早唔賣，偏偏𠵱家至賣，睇怕都係覺得生意唔再好做。老實講，人家曼聯賣盤關我鬼事咩？踢緊車路士嘅我，最驚係啲人唔睇英超轉睇西甲啫！
利世民