勁冷門的創業板股海天天線（8227），昨日股價突然急升12.86％，雖然成交細細，只得68.4萬大股，金額26.98萬大元，但經紀陳話唔好睇小呢隻股，皆因呢間公司一樣有中國3G概念。
查實海天天線昨日收市價0.395元，已經不知不覺升上52周高位。
早排本地炒作中國3G概念，京信通信（2342）等炒到㷫烚烚。此外，市場亦傳緊大陸好可能採用自己研發的TD-SCDMA為其中一種3G制式，所以海天亦有機會受惠。
話說呢種TD-SCDMA制式，係由大唐電信研發，而海天就喺早排同大唐旗下的大唐移動通信設備，成立1間合資公司，生產同埋開發呢種TD-SCDMA技術、設備同埋產品，所以亦有3G概念可炒。
股價抽高或抽水
不過，海天要投入唔少資本於合資公司中，所以市場有人揣測，公司可能會趁股價高企進行抽水。
慕容小初