坐計程車時，司機大佬多數用呢句話打開話匣子：「最近啲電影生意好似好番好多喎？」為了不長他人志氣，滅自己威風，通常都係答：「係呀，梗係啦！」
其實這幾年內，港產片生意難做，不是冇得做，但難做。很多街外人一輪嘴地說為何不多拍些像《功夫》、《無間道》或《金剛》的電影，這些說話跟為何要食餅乾唔食豬扒一樣，鬼唔知咩？
今年的港產片，真正的大贏家應是《頭文字D》，站在生意角度，由於改編自日本暢銷漫畫，所以有日本資金投資，平衡了風險；卡士投資比例健康，戲中多位演員的酬金加起來可能唔夠畀一位超級大卡士，由於《頭》片戲種鮮明，車才是主角，所以只要選角適合便可孭飛，當然由周杰倫飾演拓海亦是天作之合的機遇，結果是押中了，在香港及大陸均有很理想的成績，《頭文字D》漫畫在北美亦有市場，相信電影公司在當地亦有斬獲。
今年港產片產量只有五十多齣，相信賺錢的不足一半，其餘的能夠打個和已是萬幸。如何能只在香港上映而票房收入又能確保自給自足？較大型的製作又如何能同時兼顧不同市場的需要？大家都在摸索當中，但有一點是肯定的，縱使有千絲萬縷的計算，電影本身一定要好看，否則也只是一堆菲林，一億元的製作跟一百萬的製作，根本沒分別。