陳淑蘭自從兩頭西摩犬先後病逝後，更重視狗隻健康。她前日便帶着金毛尋回犬金珠和約瑟爹利發仔，到中醫動物診所檢查身體。蘭子謂狗兒體質和人一樣，未必適應服食西藥，故讓愛犬接受針灸治療及吃靈芝丸補身。
陳淑蘭數年前曾飼養五隻狗，其中松鼠狗和與舊愛方中信一同飼養的兩頭西摩犬先後老死，現只剩下兩頭三歲的金毛尋回犬金珠和約瑟爹利發仔，這兩隻狗均是蘭子跟前男友、工程師William交往時買的。
見男人扭patpat
蘭子說：「我好迷信，鍾意將啲狗名改做金銀珠寶，金珠跟佢老竇姓（William姓蕭），佢叫蕭金珠，大家成日以為佢係豬肉嘅豬，其實唔係。另外William好欣賞發哥（周潤發）嘅演技，所以改嗰隻叫做發仔囉！」
狗女金珠活潑好動，蘭子笑說：「佢同我一樣，好虛榮，每次見到鏡頭都好敏感，見到男人又會扭patpat。」至於狗仔發仔則性格高傲，蘭子說：「我有次畀白麵包佢，佢唔肯食，要搽咗果占同花生醬先肯食，幾奄尖㗎。」
寵物影響子女緣
自從家中兩頭愛犬先後離世，蘭子更關心狗隻的健康，前日她便帶同金珠和發仔到灣仔一家寵物中醫診所檢查身體，醫師先為金珠檢查，再為發仔針灸。蘭子說：「狗嘅體質同人一樣，有時未必受西藥，𠵱家改咗帶佢哋睇中醫。我以前嗰隻西摩犬因為唔行得，估唔到帶佢做狗針灸，竟然行得番，畀中藥啲狗食，都可以幫佢哋調理身體。」
蘭子續說：「我一直食開靈芝，最近開始畀金珠食，每日一粒，佢嘅身體真係好似強壯咗。」至於將來會否為愛犬添玩伴，她就說：「相士贈言寵物等於我嘅子女，佢話若然我近年再養狗，可能會影響將來生兒育女，所以我寧可等機緣養仔女囉。」
採訪：比華利
攝影：何國豪
髮型：ChrisTse（Salonide）
場地：香港中醫動物醫院
