恒指連續第6日升，但實際上已經調整緊。滙控（005）收130.90元，再升1.10元，拉高恒指40點。中海油（883）復牌，收5.60元，升0.20元，又拉高恒指26點。是但1隻，對恒指嘅貢獻已經大過恒指全部升幅（22點）。
恒指最高15658，升過111點，由高位回落，跌90點。一兩日內，恒指再跌啲唔出奇，等個市冇咁超買，然後再升過，向萬六點進發。
建行C輪9978：建行（939）前日見過3元，收2.975元，昨日再高2.975元，收2.90元，跌5仙。大多數熱C輪，回落8-10%。陸續有大行出報告，話建行到價。但睇番建行招股預測每股盈利0.21元人民幣，計落PE14.4倍，而交行（3328）招股預測每股盈利0.19元人民幣，股價3.975元，PE去到21.7倍。要沽嘅話，沽交行好過。交行每股盈利預測低過建行1成，而股價則高過建行37%。
建行C輪要買，或趁低買。一番變化後，9978最值得睇睇。
建行P輪2112：建行P輪有兩件，熱門嘅係2112，8月到期，輪價20.9仙，溢價14.8%，槓桿率13.9倍（有效4.4倍），引伸波幅39.3%。咁嘅數據，買唔過。正股跌幅如果唔夠大，揸2112輸多過贏。
章盛