《南華早報》噚日主辦大中華人力資產研討會，午餐時請咗司長許仕仁講輸入外來人才及培育政治人才，不過華華冇聽，只係聽咗第一場研討就走，呢一場係商業領袖論壇，有趣過政治「領袖」講嘢。
論壇由南早總監顏仕強主持，講者有香港滙豐銀行工商業務環球聯席主管及集團總經理梁高美懿，鷹君副主席羅嘉瑞同永利總裁簡博賢，其中梁太分享滙豐呢間跨國大企業嘅人力資源管理技巧，各位老闆實應洗耳恭聽。
梁太話為咗留住人才，去年集團實施一個新政策，放權畀經理級主管調節下屬薪酬，甚至可以高於市價人工，在夥計未被人撬走之前將佢留住。除咗錢，重要畀員工感受到自己嘅獨特同重要性，好似佢咁，就被外派去澳洲3年，有機會同海外嘅同事一齊工作。
滙豐對員工嘅工作評核係360度進行，不但上司，就連下屬亦會提出評價。
對於嗰啲身處領導層嘅同事，佢話必須有開放思維，引領集團去變，但唔可以對佢哋過苛，因為任何改變試驗，一般只有1/10嘅成功機會，其餘9成都唔係咁掂，如果吓吓訓斥，就會打擊佢哋嘅創意。唔知有幾多老闆容許下屬有咁多唔成功嘅經驗呢？
李華華