舊年上任做滙豐亞太區主席的鄭海泉，唔單止係該行第一個華人大班，重會係第一個進駐中峽道大班屋嘅華人，真係威水。鄭大班間新屋，大大話話都裝修咗幾個月，可能之前住嘅都係「老外」，包括浦偉士（85-92）、葛賚（93-96）、施德論（96-98）及艾爾敦（99-05），加上間屋又係英式設計，唔係太啱鄭大班口味，所以好多嘢要執，家吓都未住得。
華華噚日行經中峽道，見大宅外牆鋪上英式紅磚，幾個裝修工人就喺地下開緊工，不時傳出「叮叮噹噹」嘅聲音。華華收到風，知道間屋嘅裝修已經八八九九，亦見到有個菲傭出入，相信鄭大班一家就快可以搬入新屋過新年。
大班屋內除咗有退役尼泊爾軍人看守，重有紅外線防盜系統同埋閉路電視，保安都幾嚴密，華華只不過喺門口企咗一陣，就已經俾人查問喇！
講番呢間大班屋，佔地2.3萬呎，樓高兩層，實用面積有成9千呎，係1934年由美國運通向政府買地起嘅，唔經唔覺已經有成70幾年歷史，到1973年滙豐用430萬買入，後來滙豐賣咗天比高，佢就變成大班屋。
李華華