前日反虐殺動物大遊行盡顯港人愛心，但藝員河國榮以另一種形式去關懷動物，同樣教人感動。過去五年，河國榮先後收養了十隻因為受傷、患病而被主人唾棄的狗隻，縱使家境不算富裕，河國榮也悉心照料，義無反顧。
家住清水灣村屋的無綫藝員河國榮雖然不算富裕，但愛心洋溢，眼見那些因為患病或受傷而被人遺棄的狗隻，他與太太也會忍不住抱回家收養，帶牠看醫生，悉心照料。在過去五年多以來，他已先後收養了十隻狗之多；加上月前他與太太在西貢發現一隻被車撞傷的小白兔，現時河國榮的家就有如動物園般熱鬧。
河國榮說：「隻兔仔應該係俾車撞到，搞到左邊成身傷痕，左眼又盲咗，我帶佢睇完醫生之後，諗住帶佢去愛護動物協會，但佢哋話隻兔仔有一隻眼睇唔到嘢，擔心冇人領養，唔肯收留，所以我咪帶返屋企養住先。」
月支二千買糧
事實上，河國榮家中十隻愛犬，每隻背後也有其感人故事，如河國榮收留的第一隻狗Dallas，便因為患病而被主人遺棄，河國榮說：「佢係以前嘅鄰居養，每日我返工都會見到佢，直至有日唔見佢出現，我同太太四圍搵佢，發現佢匿喺隔籬屋士多房，郁都郁唔到，我哋即刻抱佢睇醫生，原來佢嚴重貧血，再唔醫嘅話就會死；後來醫好咗之後，我就同佢主人講話收養佢。」由一隻變成十隻，每月開支豈非愈來愈大？河國榮笑說：「如果唔計睇醫生同打針，每個月買狗糧都係花二千幾蚊啫！睇醫生真係好貴，好似早排Betty患咗一種好罕有嘅病，又照X光又睇醫生，花咗成兩萬幾蚊！開支大都冇辦法，你收養得佢，就要承擔責任。不過，十隻已經好夠，我唔再收養㗎啦，除非我唔要我太太啦！」
呼籲加重刑罰
為讓愛犬有更大活動空間，河國榮年前特地細屋搬大屋，在晚上又會將愛犬鎖在屋內，避免聲浪擾人。對於前日五千名愛護動物人士舉行反虐殺動物大遊行，促請政府加重虐殺動物人士懲罰，河國榮說：「我啱啱返香港，唔知道呢個遊行，但我都覺得𠵱家刑罰太輕，五千蚊（最高罰款）算得乜嘢？應該起碼罰二萬蚊，或者六個月監禁。」
採訪：戴彩煥 攝影：仇志中
