昨日大市再次發威，恒指勁升202點，唔少股份升完又升，睇到小初眼花撩亂，唔知重有乜嘢好買。
經紀黃話，股價創新高的超大現代（682），近期密密路演，加上獲美資證券行推介，相信股價有力再創高峰。
超大昨日隨同港交所（388）高層同埋馬局長去大馬做路演，與此同時有間美資行推介超大，將目標價定到4.60元咁高，真係嚇咗小初一跳。超大昨日又創新高，收3.70元，升1.37％，成交股數476萬股，金額1769萬元。
超大去年股價一直在3元上下浮沉，悶到不得了，但金手指一直對佢不離不棄，坐住10％股份，如今一旦話有人睇起，股價即刻起航。
查實今次美資行睇好超大，不外乎話讚賞佢哋毛利率高過其他農業股，同埋公司成功擴大產量。此外超大今次大馬之行及稍後慶祝上市5周年活動，可以提高公司知名度。
慕容小初