街機之上，真係好耐未有令人「嘩」一聲的作品！新返嘅《HouseofTheDead4》係少見嘅精品！動用68"大螢幕嚟燒槍，感覺有如一隻隻1:1喪屍迎面撲埋嚟！起用SEGA最新LINDBERGH街機技術，超立體、真實已經唔使講！更勁者是有如1080i高清遊戲畫面、下下20幾隻喪屍對住你圍咬，每放一下槍，喪屍中身「剝皮」、中頭「即爆」毫不含糊，絕對是槍Game從未曾達到的境界！
記者：朱崇德
攝影：林栢鈞
ImageGirl：Yuki
據知今次《HOTD4》香港返貨唔多，全港大概30零部，好多機舖都爭崩頭！每局機價5、6個大洋，不過排隊情況好普遍，事關遊戲難打度超高，好多人都用50、60蚊煲爆機先罷休，計埋一鋪都要打半句鐘，槍Game嚟講都算罕見。雖則話咁難打，記者在觀塘金沙撞到槍王Kevin，新機落地幾日，佢就即場示範如何「一鋪爆」，想知過關斬將訣竅，真係必睇！
新LINDBERGH底版 玩超靚畫面
《HOTD》（97年）一直都係街機槍Game的大作，《HOTD4》第一個話題焦點，都可算是佢個68"大螢幕！雖則近百吋的「投射」槍Game都曾經出過，不過畫面有如1080i高清畫面又咁精細，真係前所未見！據香港代理太田娛樂表示，它是使用了DigitalPlasma；不過香港多間代理Plasma及LCDTV的公司則表示從未聽過這方面技術，就記者觀察所見，發現機背有一個好似投射膽的物體，估計有可能是一部後投大電視！
畫質咁靚的另一大原因，是《HOTD4》首度起用了SEGA最新LINDBERGH底版！齋睇規格，行P43.0GHz、nVIDIAGPU、512MBSD-RAM（PC3200）×2、DVI影像輸出及5.1聲道輸出，簡直儼如一部超級電腦，難怪有咁強勁嘅表現！
20幾隻喪屍圍咬
筆者縱橫打槍Game多年，都係首度遇上20幾兩喪屍圍咬的經歷，須知他們全以立體多邊形表達，有動作有表情，加上精細的場景及光源變化，中牆會有火光及彈孔，喪屍中身會甩皮、中頭獎就即爆，只可以用恐怖嚟形容！由於今集喪屍的「恐怖」力量加強了，玩家的武備亦加強至30連發的UZI機關槍；上集的散彈槍經常俾玩家詬病無準頭，今集的UZI真係出得又準又有手感！梗係啦！佢同名氣大作《GhostSquad》一樣使用了10點紅外線感應系統，打落反應又快永無失槍！
新增Fling槍退敵系統
成名的分支路線系統今集都加以保留，不過感覺只是「出怪」多少的選擇，對故事結局及內容影響不大，有些少浪費。今集新加了一個Fling槍系統，UZI的尾部加入了一粒鐵珠，遇有喪屍捉着不放、開門及特定危險情況都要以Fling槍嚟脫身（最尾一版大佬的地面冰柱，原來都可以Fling槍脫困㗎！）不過槍支設計頗多角，好多Gamer都打到損手爛腳，專家級玩家建議要一手揸柄、一手揸槍頭Fling，反應力度會大啲！大彈系統係今集致勝關鍵，基本打嘍囉時盡量慳家咪亂用，事關各版大佬起碼要有3個或以上招呼佢先過關；難打之處是每版大佬都會有防禦技能應付攻擊，這時就要出大彈，留意大彈掣Hold的時間長短有遠近效果，而且掟出後數秒先爆炸，所以一定要懂得「先讀」放彈，都幾考人吓，你話有乜辦法唔打到人欲罷不能。
槍王Kevin一鋪爆機心得
「打得靚時，經常會俾20幾人圍，除咗留意由近打到遠先後次序外，見到肥佬、大隻佬一定要先打，因為佢哋皮較硬。每版大佬都有特定攻擊模式，如第一排大手怪，會在第2、4、5輪攻擊玩家，必放大彈，多睇人打可知放彈時機！」
機迷教路！
Andy$60攻爆機
「第一次用咗$60攻爆機，𠵱家每日唔打過都唔安樂，留意大佬除打弱點外，打身都照扣血（不過少啲），當佢遮住弱點時都記得要放槍。」
Tommy畫面靚爆
「真係未見過咁精細畫面嘅槍Game，但真係唔好太沉迷，下下幾十蚊攻爆機真係幾「赤」吓，𠵱家都係睇人打多，真係睇戲一樣咁正！」
Yuki好潮呀！
「我發現Player2女主角，竟然係同我用緊同一部SEW800i手機㗎，真係跟得幾貼吓喎！」
金沙遊戲機中心
地址：觀塘觀塘道410號地庫01室
電話：31682530