賓架L位公子自南加州大學畢業之後，返嚟香港工作，但仍然鍾意美國生活，於是與賓架L拜拜，走番去加州。賓架L位千金就鍾意留在紐約，於是兩人世界仍然持續。前幾日（一月五日）早上，美國大學足球季打到最後一場，由南加大對德州大學爭玫瑰碗（RoseBowl），事前一致看好南加大，認為贏梗，問題只係贏幾多分，賓架L打電話到加州同個仔傾偈，個仔話：「好緊張，重有幾分鐘我哋就破紀錄，連續第三年贏全國冠軍。唔同你講住。」慘咯，完場前十八秒，德州大學達陣（touchdown），反敗為勝，以四十一對三十八取得全國冠軍，令南加大學生大吃一驚，大失所望，南加大校友由狂喜變成同聲一哭，賓架L位公子相當冇癮。香港亦有好多南加大校友垂頭喪氣，佢哋相約（朝早唔返工）在交易廣場頂樓美國會所睇現場直播，睇完相信食唔落午餐。南加大校董，南加大校友陳啟宗可能係最失望一位。大學畢業生之中，好少有一位人士，無論國籍男女，會似陳啟宗咁狂熱擁護母校嘅。朗尼陳既親身為南加大宣傳，送個仔到南加大（已畢業），熱心為母校籌款兼招收有潛力學生（最好係才財兼備），又肯參加學校活動，南加大真係執到寶。
朗尼陳中學畢業於聖保羅男女校中文部，聽一位聖保羅校友講，陳父陳曾熙先生要陳啟宗學好中文，故此佢嘅英文水平雖然非常好，但唔願意讀英文部，此一點，李國章局長既係聖保羅男女嘅師兄，大可以請陳師弟宣揚母語教學嘅好處！
有一個調查話，球類比賽之中，英式足球最刺激，爆冷機會有四成五（即以弱勝強），美式棒球第二，冰上曲棍球第三，NBA籃球第四，NFL足球第五。美式足球本來唔容易爆冷嘅，呢次南加大實力佔優，但因為一個月冇波打，等呢場終極決賽，點知球員有啲生銹，出咗幾次錯，於是飲恨，不能創造歷史。