港股要升，真係㩒都㩒唔住，408億元嘅大成交，衝破15500嘅大阻力，後市繼續向好。
國企指數又大升126點，上到5804，呢次國企股係消耗性上升，預計會上到6000，現時國企股累積升幅已大，隨時會出現回吐，可趁其調整完成後再落手。相比國企，恒指成份股的升勢略為落後，其後市的升幅會較大，在15500水平略作整固後，初步可向16000推進，但有機會上到16300才停步。
不過，到目前為止，細價股重係小郁，好多重係大落後，可能唔使等到國企同藍籌唞氣之時，股仔已蜂擁接力而上。
石油股再發力，中石油（857）收6.75元，升0.20元；中石化（386）收4.10元，升5仙；中油（香港）（135）收1.81元，升7仙。睇走勢，中油已去到突破邊緣，短期內升幅會好大。
由去年8月中開始，中油走勢形成一個大型複式頭肩底，頸線在1.83元，噚日成交大增，升勢有大成交支持，一衝破1.83元阻力，量度上升目標係2.30元。
預測PE只6.46倍
國際油價調整後，現時又回升到64美元水平，中油05年度（12月年結）的上半年，營業額15.02億元，升29%；盈利6.1億元，大升44%，受惠油價急升，期內原油銷售量606萬桶，同比相若，加權平均售價每桶36.85美元，升38.65%。因油價仍企於高水平，中油去年下半年同06年仍會大躍進。
油價每上升1%，中油盈利可上升5.8%，相比中石油的3.3%同中海油（883）的3%，具有更大的槓桿效應。05年全年，估計中油盈利13.5億元，每股盈利0.28元，預測PE只係6.46倍，摩根大通報告建議增持，目標價係2.20元。
中油係中石油的兄弟公司，大股東中石油集團持有52.55%權益，系內有兩家同性質的上市公司，雖然「晒士」不同，但會否有架構重叠問題，令人關注，所以，日後中油若被併購或私有，不會令人感到意外。中油現價為資產值的1.7倍，若追近中石油，即使以2.5倍計，股價亦可見2.675元。
郭兆誠