06年頭剛開始，估唔到股市大旺，唔知雞年係咪可以行尾運，延續到狗年？滙豐經濟顧問梁兆基噚日應國際會計師公會之約出席午餐會，講吓點睇今年香港經濟表現。佢喺開場白將自己同啲風水師相比，話佢哋都係年頭講得最多嘅兩類人，而且風水師數目有多於分析師之勢，唔通真係咁多人信風水重信過實質經濟數據？梁兆基就曾經俾人問過，話：「你估得咁準，背後係咪有風水理論支持㗎？」
梁顧問跟住直入正題，話之前6至7年嘅董建華年代，估經濟易估好多，一定係持續向下，不過佢強調並唔係揶揄董生，而係當時邊個做特首都難以扭轉跌勢。佢話其實應該畀番分董生，因為如果唔係董生向中央爭取到自由行同CEPA，香港唔知幾時先至經濟復甦。