小小超李澤楷想買番份報紙做傳媒大亨，經已係一個公開秘密，噚日又有報紙寫到真一樣，話小小超個首席副手JackSo蘇澤光（圖左，右為電訊盈科指南行政總裁李業峰）首度唔否認，JackSo出席黃頁記者會，回應話呢啲唔係公司投資，所以唔講，咁係咪小小超私人買呢？佢話更加唔會講。而路邊社權威人士就同華華講，一向都郎有情妾有意，再者價錢唔係好貴，無理由唔買——都係嘅，華華買衫有時都唔等減價，鍾意咪買囉，如果減價就更加唔諗啦。
講番JackSo，唔知點解佢噚日心情靚爆，睇佢成場四萬咁口，可能佢同小小超斟掂數，就算斟唔成都搵到好路數，只係難為班夥計，成年做得咁辛苦，都未知有無人工加。好心農曆新年前就畀個好消息啲員工，等大家開心吓！
程志遠攝