個市欲罷不能，恒指上到15547收市，高過去年8月中15508高位。恒指進帳202點，其中76點由滙控（005）貢獻。滙控最高130.10元，埋單129.80元，只由高位回吐0.30元，較前市則升2.10元。
滙控C輪4907收64仙，升幅41%。已略呈負溢價，有權啖啖肉，或照正股波動打個9折，即滙控再升3元，隻輪升25-27仙。
中銀C輪9068：大棚C輪飛升，𠵱家入市，冇賺過錢嘅要先諗諗，賺開錢嘅賭落去。揀熱門輪炒，摷來摷去，都係揀上周五推介嘅中銀C輪9068埋手。
報館記者電告，睇到彭博社嘅統計資訊，話荷銀上周三出報告，滙控睇164.37元，乜咁厲害？滙控若再升，中銀（2388）亦有運行。另外，中銀大股東中行，據報道已獲國務院批准來港上市，正等緊證監㩒綠燈掣。再另外，恒指新高，中銀距上次高位16.95元重差1.25元，點都要追番。入市新聞，對中銀有利。中銀見16.95元，9068值2.07元，𠵱家上車可能博到100%回報。
中信C輪3525：中信泰富（267）追落後，買C輪3525。隻輪8月初夠鐘，輪價11.7仙，溢價3.6%，槓桿率19倍（有效10倍），引伸波幅18%，冇邊隻同類輪靚得過佢。
章盛