鄭伊健自宣布與梁詠琪（GiGi）分手後，昨日首度公開露面，只見他臉容憔悴，雙眼滿布紅筋，更眼泛淚光。平日在記者面前表現調皮的伊健，昨日在記者會上十分拘謹，被問到他跟GiGi有沒有可能復合時，伊健只是苦笑搖頭，未有開腔回答。
鄭伊健和梁詠琪結束近七年的戀情，大前日和前日GiGi如常工作，至於男主角鄭伊健則沒有露面，只透過經理人林珊珊承認分手。回復單身的伊健昨日終於出關，到尖沙嘴香格里拉酒店出席其代言的數碼相機記者會，吸引過百記者採訪，場面十分墟冚。
不再調皮
回答問題嚴肅拘謹
記者會由伊健的老友林曉峰擔任司儀，他甫開始便笑說：「我知今日大家醉翁之意不在酒，但係個showwillgoon。」及後伊健由兩名穿上太空服的工作人員陪伴出場，他疲態畢露，臉容極之憔悴，雙眼布滿紅筋，更眼泛淚光，似乎分手後心情仍未平復。而伊健平日面對記者時調皮愛開玩笑的性格也不復見，大部份時間都笑容欠奉，表現嚴肅拘謹。
伊健昨日明顯有備而來，他逗留僅十分鐘接受文字及電子傳媒訪問，之後再到後台接受無綫《東張西望》主持、舊愛黎芷珊的訪問，以下是記者和鄭伊健的訪問內容。（記：記者鄭：鄭伊健）
記：心情平復未？
鄭：冇乜嘢，都係咁，大家都知道咗，大家都係覺得呢個時候應該分開。
記：邊個提出分手？
鄭：雙方，大家有共識。
記：分手原因？
鄭：呢個係兩個人之間嘅嘢，明白係公眾人物會得到關注，但唔需要交代，作為公眾人物，大家知就得。
記：是否如傳聞一樣嘈交分手？
鄭：都唔關事，我已答晒大家，總之我哋係朋友，件事發生之後都有聯絡。呢段時間好開心，因為有好多人關心我，幕前幕後都有人打電話或者sendmessage畀我，雖然有啲都冇覆到。
否認移情
「唔好拉埋呢啲嘢講」
記：係唔係識咗新女仔？
鄭：你話呢？唔好拉埋呢啲嘢講。
記：有指GiGi覺得你嘅事業不如佢？
鄭：要答都答晒，係兩個人嘅事。
記：查小欣喺商台節目上指你同GiGi喺日本旅行期間發生了一件事才導致分手？
鄭：我冇聽節目，唔知。
記：咁你有冇去日本？
鄭：都唔係咁緊要啦，大家知件事就得，多謝大家關心。
記：網民指GiGi扮可憐？
鄭：希望大家唔好渲染太多。
記：網民話你負心？
鄭：（搖頭不語）唔該晒。
記（普通話）：是否有復合可能？
鄭（苦笑搖頭、普通話）：不知道這事情，已講了分開就算，這是私人問題，謝謝你們。
伊健接受訪問後即匆匆離開，在酒店門外有數名歌迷贈送頸巾等禮物，歌迷更說：「我哋撐你。」但伊健未有停留就上了保母車，之後伊健與經理人林珊珊及林曉峰到新世界萬麗酒店，逗留近一個鐘就返回匡湖居寓所。
情傷不淺
事後接受心理輔導
林珊珊亦坦言之前已為伊健做心理輔導，強調伊健的工作未有受分手報道所影響，更表示他的工作已排到四、五月。對於不少網民評論兩人分手的事，珊珊就說：「任何男女關係，公開定唔公開，結咗婚定離咗婚，一定會有人有意見。總之係佢哋兩個人嘅決定，𠵱家各自努力工作，至於話影響到工作，我都好難控制同面對，好開心伊健嘅廣告商有打電話慰問佢。」珊珊亦暗示兩人因為聚少離多而分手，她說：「其實佢哋要見面會極力爭取，不過兩個人都咁忙，的確係一個影響。」
此外，伊健舊愛黎芷珊昨日代表無綫訪問伊健，她表現避忌，和伊健做訪問時更在後台避開傳媒鏡頭，黎芷珊強調無綫不是刻意安排，她亦不會覺得尷尬，她表示伊健的心情未有異樣。
採訪：駱華齡、胡比
攝影：陳志嵐
