中海油董事長傅成玉與影星章子怡，同被《時代》雜誌亞洲版選為05年14位世界最有影響力嘅人物，可算威到盡。有內地報章引述傅成玉講話，話中國今天跟80、90年代相比，最大嘅變化係中國人𠵱家有尊嚴。過去參加國際會議，基本上只有聽嘅資格；但今日中國人參加國際會議，唔單止有資格發言，對方亦會好認真咁聽。傅成玉去年領導中海油以1443億元收購美國油商優尼科失敗，但聽傅老總呢番話，可以預期，中海油再提出巨型收購指日可待。
傅成玉亦透露咗一件佢嘅小事。原來佢最鍾意食冰（真嗰種），因細個嗰時喺東北生活艱苦冇嘢食，冬天只能夠食冰塊。佢重笑言呢個係歷史環境養成嘅愛好。
原來佢大學畢業（讀地質學），第一份工作係喺鑽井現場同工人一齊撈沙，一撈就撈咗3年；佢認為做人從小事做起，打穩基礎好重要。