踏入06年的港股氣勢如虹，連續上升4日，累積升幅3.1%，恒指成功衝破15250的雙頂阻力，高收15344，後市可反覆向高位進發，在去年8月中及10月初的15500高位前會有阻力，整固後而有大成交（逾300億元）配合，衝破機會甚大。
今次恒指以大成交衝破15250的徘徊區上阻力，確認開展新上升浪，以量度升幅計，上升目標指向16280，大藍籌股如滙控（005）、長實（001）、和黃（013）、新地（016）同中移動（941）等會升完又升，其中尤以和黃大落後，更值得留意。
濠賭股已蠢蠢欲動，中國彩票概念股亦捲土重來，3隻交投較活的中彩股，以看通集團（1059）最抵博，睇埋下便幾個理由，相信大家都有同感。
1.其他兩隻交投活躍的中彩股，華彩控股（8161）筆者一直都有推介，上周五股價又創出新高，收3.10元，而去年9月中的高位係2.90元。另外，中國蜂業（8156）上周五高收1.68元，亦已追貼去年8月中的高價1.88元，只相差10%。至於看通，去年9月曾高見0.84元，家吓只係0.54元，低咗35.7%！
基金揸長線顯信心
2.去年9月底，看通先舊後新，配售2.4億股，每股0.73元，畀晒機構投資者，散戶冇得分，基金有信心揸長線，當然有揸拿，時機一成熟，股價就會倍升。
3.看通去年中進軍內地電子彩票投注業務，可以分享投注業務營業額的循環收入，最新消息話好快會申請網上博彩牌照，而公司亦已重金禮聘4名馬會前高層幫手，牌照一批，就可開鑼。
4.看通主營有線及無線電技術網絡解決方案，生意好大，05年度（6月年結）營業額就逾11億元，獲利2.68億元，往績PE只係4.7倍，比先進市場同類股10幾20倍低好多，家吓重有「中彩」呢味「添加劑」，真係隨時會發威。
5.由去年10月開始，看通走勢形成一個大圓底，家吓已去到突破時刻，升破0.56元阻力，照度上去，短線上升目標係0.74元；中線可升幾多，無謂估，基金一發動攻勢，升幅冇得計。
郭兆誠