在機場隔籬嘅亞洲國際博覽館開咗無耐，已經接咗30幾個展覽及表演。家吓香港多咗個場地，地方又較大，所以唔少以往有客但無場地嘅展會搞手都蠢蠢欲動，好似喺國內做開商貿展嘅GlobalSources就係其中一例，佢哋一次過訂咗６個展會檔期，做咗展館嘅大客，聽講本地有展商好唔滿意，認為政府手指拗出，咁佢哋當然投訴，政府就話自己雖然係呢個場大股東，但一切按商業原則辦事。
GlobalSources業務總經理黃譚偉就話，公司總部一直都喺香港，員工有成2200人，佢哋都想喺香港搞展會，但會展啲期一直好Full，尤其是係4月同10月呢兩個採購旺季，真係有錢都冇場地，所以只可以移師到上海囉！
03年佢哋收到風話會起博覽會，就即刻投交計劃書Book期，先至可以回歸香港，第一炮係四月嘅電子展！黃總又話，雖則香港場租貴過大陸，但係酒店、物流等配套好，又多國際買家，所以今年會增聘人手，淨係銷售都要請40人。
機場起展館，最先反對力量來自貿發局，因為怕分薄會展生意，後來知道阻唔到，馬上轉諗點合作。跟住輪到原先諗住多個場可以平啲租嘅展商，又變成反對派，講到底都係利益，而政府介入商業活動，就一定多是非。
李華華