廖碧兒年前養了玩具貴婦狗Mac，由於覺得Mac非常靚仔，便帶牠四處相睇擇偶，最後終物色到僅三個月大、同品種的Bailey成為女朋友，待牠長大後便會與Mac成親，炮製愛情結晶。
廖碧兒現時養了兩頭玩具貴婦狗，其中一隻是一歲大、重六點六磅、朱古力色的雄犬Mac，另一頭就是只得三個月大、體重未足一磅、忌廉色的小狗女Bailey。原來養Bailey完全是為了與Mac配成一對，希望這對俊男美女狗組合能炮製出絕世好狗。
詐嬌作惡
日前廖碧兒帶着兩頭寶貝犬到將軍澳拍照，別小看Mac狗仔細細，吠起上來卻聲大大；Bailey剛巧相反，斯文乖巧，只喜歡倚偎在主人懷裏歎世界。
廖碧兒笑說：「Bailey扮嗲咋，佢個樣好女仔，惡起上嚟真係好惡；Mac係扮惡，其實冇膽，吠吠吓就行返轉頭，但Mac好就到Bailey。」
廖碧兒表示年前朋友所開的狗場結業，遂把Mac送給她，回想第一次跟Mac見面，便引證彼此確有緣份，她笑說：「佢一嚟就喺我膝頭哥瀨尿，朋友即刻話：『佢係你㗎啦』我就咁帶咗Mac返屋企。」
在廖碧兒眼中，Mac非常靚仔，她說：「之前我帶Mac去做全身檢查，之後帶佢見其他貴婦狗主，幫佢搵女朋友，但有啲唔肯帶隻狗去驗身，我覺得檢查好重要，會影響到第日生BB。Mac又唔係隻隻狗都鍾意，有啲唔鍾意，嫌人哋唔夠女人味，又擰歪面，後尾咁啱有朋友送Bailey畀我，佢同Mac又配合到喎，好彩Bailey冇Mac咁活潑，如果唔係我實心臟病。」
「開心好多」
Mac和Bailey同是玩具貴婦狗，Mac有時亦會呷Bailey醋，廖碧兒笑說：「Mac點都要整到自己喺屋企有少少權，但佢都好錫Bailey，𠵱家我要佢哋分床瞓，等Bailey大啲，發育健全晒至生ＢＢ，𠵱家我都覺得自己對佢哋有責任，但自從有咗佢哋之後，真係開心好多。」
採訪：朱倬誼
攝影：何國豪
