美股由科技股帶動上升，而滙控（005）ADR又高出港市好多，今朝港股，好難唔裂口性高開，買C輪要畀高啲價錢。
和黃C輪9192：和黃（013）上月底出售部份和電（2332）賺74億元趕住入05年帳目，意大利3G分拆計劃又有進展，連串動作有利股價，上周五彈升1.30元，唔會短癮，繼續上升。
揀和黃C輪炒，3月到期嘅9043本來唔錯，但上周五單日已升27%。可由4至6月到期嗰批，搵隻埋手，9192諗得過，上周五收55仙，升13%，6月初夠鐘，溢價5.9%，槓桿率13.9倍（有效7.8倍），引伸波幅26.3%。隻輪街貨9.5球，好少，容易挾上。買賣唔難，有28球易手。壽命相若嘅9709與9790，上周五升21%與17%，估計9192升幅可以追上。
滙控C輪4907：3月至5月到期嘅滙控熱門C輪，原來有4隻已經出現輕微負溢價，負溢價係因為正股喺C輪夠鐘前除息兩元突啲。但計埋股息因素，溢價都係低。反正都係賭，4隻負溢價輪中，揀隻槓桿率最勁嘅埋手可也。4907槓桿率28.1倍，大晒。其他3隻（4789、4841、9606）平均得18倍幾。滙控ADR折合130.3元（港市上周五127.70元），滙控C輪今日肯定搶到七彩。
章盛