近排不但藍籌、紅籌和國企係咁升，細價股亦陸續見有搞作，其中半新股威勝儀表（3393），首日掛牌跌破底價，但第2日已經試底成功，之後股價就一直係咁升，從未停過。
經紀陳話，據講係因為搵到高手落場幫手，所以隻股近期愈戰愈勇。
威勝於去年12月中，以每股1.13元招股上市，上周五最高升至1.71元，收1.68元，比起當日招股價，升幅高達48.67％，有貨揸到𠵱家，真係賺到笑。
半個多月升5成
經紀陳又話，威勝上市之時，正藉新股熱潮，所以公開招股認購頗熱鬧，分咗唔少貨源出街，所以股價先至會首日破底，但有關人等好快就收集完成，之後升勢如入無人之境。
威勝主要從事電能計量和管理系統整體解決方案，呢門生意對本地投資者嚟講相當冷門，唔係太多人敢掂，但有個基金喺威勝上市時揸咗6％以上股權，隻股咁升法，相信佢哋肯定好滿意。
慕容小初