樓市舊年開始調整，華資代理紛紛話要cut舖，不過國際行第一太平戴維斯就話逆市擴充，重喺行內大事挖角，蘭西最近發現，佢哋租寫字樓好豪，續租交易廣場大本營，一個月就要向置地進貢一百零一萬二千蚊，即係每個月要做一兩億生意至夠交租同雜費。
戴維斯最近同傳媒講，代理部舊年純利一億，比九七年多逾一倍，睇嚟係計埋年尾促成單娛樂行成交嘅二十七億佣金。
原來淨係總部交易廣場一年租金，就用咗戴維斯近一成利潤，難怪佢哋就算請多咗人，寫字樓都冇擴充，只係將房間間細啲，或者改開放式，務求慳番啲地方，變相慳租。
情願畀業主大幅加租，每人用細啲地方，都要力保交易廣場陣地，除咗嗰度就近美國會所，夠私隱，大廈獨有嘅二十四小時空調設備，同到處講電話都唔斷線，對跑deal嘅經紀嚟講係絕對優勢。
電郵地址：[email protected]