利世民今日又有新要求，就係要請社會各路人馬一齊幫手諗諗點樣幫老師解解壓！無壓力的老師，先可以教出開心嘅下一代；有開心嘅下一代，香港先至可以有陽光普照嘅未來。呢個係香港嘅深層矛盾，唔解決手尾長。
老實講，邊有打工仔唔使競爭？曾蔭權就算自動當選特首都有競爭。君不見各路人馬仍然牛咁眼昅實特首個位。一個大意失荊州，就會好似董伯咁，俾人升上神枱，重有邊個夠膽話呢個世界可以無競爭？
不過老師𠵱家面對嘅競爭，可能比政治圈嘅競爭重犀利。一時又要做校本評估，一時又要幫學校攞獎。老師一心想教好學生，但係迫於無奈要喺無關痛癢嘅地方競爭，對學生一啲好處都無，所以都唔怪得啲老師睇呢個世界咁灰。
其實競爭幾時都有，問題係你睇唔睇到，而且有競爭唔一定有進步，好似老師面對咁嘅情況，競爭有時候只會帶嚟無謂嘅壓力。講嚟講去，其實利世民都係個句︰「學券制」。簡單講，學券制就係由得學校去收學生，多多益善小小無拘，總之收到幾多學生政府就照數人頭科水。學校要多啲資源，就要收多啲學生，要收多啲學生就要教好啲。
有競爭 更要良性競爭
學券制至少等老師知道自己做緊乜，唔使吓吓為評核而評核，為攞獎而攞獎，搞到一頭煙最終反而換嚟一句︰「明年開始，教統局新政策將會…」如果香港行學券制，學校重使乜做埋呢啲不切實際嘅乜乜物物評核。學生嘅報名表就已經係一間學校嘅最好評核！
老友問︰「你嫌老師壓力唔夠大咩？重要佢哋競爭？」非也，利世民只不過係睇通咗競爭永遠存在這一點，所以要解決𠵱家嘅問題，係要將惡性競爭變成良性競爭，唔係逃避競爭。
點解學券制係良性競爭？因為喺學券制下，學校不但要好學生，更加要好老師。利世民相信世上有好多好老師，只不過係制度有問題，所以佢哋先至有志難展。既然老師都想教好學生，而教好學生又係老師天職，學券制當然係良性競爭。除非你唔相信老師都想教好學生，如果唔係又邊有理由去反對學券制？
利世民