由美國各地主要報章、雜誌影評人所組成嘅美國國家影評人協會，前日喺紐約曼哈頓投票，選出該會第四十屆頒獎禮嘅得獎名單。結果由王家衛執導嘅《2046》得到最佳攝影，重喺另外四個獎項中打入三強，反而被喻為金球獎同奧斯卡大熱嘅《斷背山》（BrokebackMountain）居然一個大獎都冇。
美國國家影評人協會前日公布本年度得獎名單，早前已經囊括多項影評人大獎嘅美國電影《Capote》成為全年最佳電影，而《2046》一片則排名第三，僅次於《Capote》同加拿大電影《AHistoryofViolence》之後。
而拍攝《2046》嘅杜可風、黎耀輝同關本良力壓眾荷李活大片得到最佳攝影，章子怡亦憑呢套片得到最佳女配角亞軍。王家衛就得到最佳導演第二名，套戲亦得到最佳外語片亞軍，僅次於德國片《Head-On》。
菲臘封帝
至於唔少人關心嘅影帝影后獎座，分別由《Capote》嘅菲臘西摩荷夫曼（PhillipSeymourHoffman）及《弦途有你》（WalktheLine）嘅麗絲蕙絲潘（ReeseWitherspoon）奪得。李安執導嘅《斷背山》今次可算失威，所有大獎都冇份，只係男主角希思萊杰（HeathLedger）奪最佳男主角第三名，不過票數被遠遠拋離。
