年年看商台主辦的叱咤頒獎禮，入場券難求，外甥仔與外甥女都想睇，今年輪到外甥女睇。場刊中附有一張拉頁海報，集齊了今年出版的CD封面，問外甥女哪一張CD最搶眼，「其實全部都差唔多，都係啲歌星個樣咁囉，冇乜邊張特別特別」，外甥女答。童言無忌，但頗有參考價值。
《叱咤》的特色是主持人廢話少說，讓音樂做主角，「咦？佢哋喺台上可以唱晒成首歌嗰喎」，外甥女年紀小但心水清，的而且確，在其他大部份頒獎禮中，音樂被放在較其次的位置，得獎歌手只能像做台慶騷一樣，每人撈到幾句唱吓，Key都未捉準就已經唱完，反而司儀及嘉賓們可以發噏風發個天荒地老，再唔係玩遊戲整蠱吓緋聞男女，那位歌手在音樂上下了多少苦功並不重要，娛樂新聞炒作才居功至偉。
從噓聲中長大的Juno奪得了個人歌曲獎項，激動得聲音抖震，講出了一番肺腑心聲後，用心地唱出了得獎歌曲《雌雄同體》，外甥女說：「佢唱Live唱得好好喎。」
看《叱咤》看到了很多的「真」和「志在」，歌手和觀眾的反應很真，大家對這個頒獎禮很志在。歌手們在台上握着一個很志在的獎唱出得獎的歌曲，代表着一年來努力的成果，那種歌聲很能感動人，所以愛看《叱咤》。