鍾嘉欣：啲人應該相信同我冇關，都太耐啦，我同伊健拍戲時有交換電話，但冇聯絡過，拍劇時都各有各忙，唔會將私人感情帶落去。（會否有發展可能？）冇啦，唔會啦。
陳小春︰佢哋拍拖咁多年做乜要分手？點都好，我好心噏，佢兩個好襯㗎，俊男美女。噚晚我打過畀伊健，遲啲會約出嚟傾，又唔覺得佢心情唔好呀，唔係突然發生，我諗之前都有啲伏線。作為佢朋友，我當然唔希望佢哋分開啦！其實佢哋係咪想避開你哋（傳媒）咋？地下情喺外國就奇，香港就一啲都唔奇，我希望佢哋農曆年手拖手嚟睇我套戲。
克勤祝福各尋好生活
張敬軒：吓！係真定假？聽到呢個消息真係好愕然，我𠵱家喺馬來西亞做嘢，偶像唔開心，身為fans都會唔開心，不過大家要尊重GiGi決定，希望佢以後過得開心。（你曾經講過因為鍾意GiGi而憎伊健？）當時講笑咋。
李克勤：我點會知，我同GiGi平時只係講音樂，我同阿倫咁熟都唔講屋企嘢。作為朋友唔應該畀任何意見，希望佢兩人搵到好生活。
楊千嬅：分手？唔係啩！當年佢哋係咪喺《仲夏夜狂想曲》一吻定情？我對呢啲嘢好遲鈍，如果唔遲鈍，我都已經結咗婚啦！
周麗淇：我今日睇報紙知道，幾可惜，佢哋幾襯，但係感情係兩個人嘅事，外人係唔知，希望唔係真嘅就好。我有諗過打畀伊健，不過佢應該幾煩惱，做朋友都係唔好騷擾佢，等佢哋解決。今次發聲明公布，搞到幾大新聞咁，可能佢哋拍咗拖咁多年兼經歷咁多嘢，希望佢哋開心就得。
薛凱琪：好可惜，我之前同伊健合作過音樂劇，同GiGi又係同公司，不過未見過佢哋一齊出現。作為局外人，我諗唔應該畀意見，我一路都覺得佢哋好襯好sweet，分手唔係開心嘅事，嚟緊啲報紙評論，當事人睇到都會唔開心。
杜汶澤：我同伊健一路有keep住聯絡，佢唔鍾意出夜街，所以好少出嚟，佢亦唔會講感情事，不過我會打電話畀佢，感情事冇得講，只有當事人先知。
