白花油廣告的主角除了顏福偉，亦出現過不少名人和藝人包括黎瑞恩、袁潔瑩、奧運男子跳水單人三米板金牌得主彭勃、鄧浩光和陳鍵鋒等，當中有跟顏福偉傳過緋聞的，日前他就對這幾位名人藝人評頭品足。
彭勃：音樂外交得米
我承認係因為虛榮，先會識得彭勃，我寄信去天壇公寓（北京體育總局的運動員公寓）畀佢，話我好欣賞佢，信中留咗我嘅電話，重附送我嘅CD一隻。之後佢打電話畀我，大家做咗朋友。早期有乒乓外交，我呢個係音樂外交，一隻CD就識到奧運金牌冠軍。上年國家隊嚟香港時，我上台表演，羅雪娟對我印象好深刻。一個商人，除非好有錢，否則只係同佢哋握過手，人哋點會記得你。
黎瑞恩：連電話都欠奉
我都唔明點解會同黎瑞恩傳緋聞，佢同陳鍵鋒嘅電話我都冇。陳鍵鋒嘅經理人，就係當年我組樂隊川鳴時嘅經理人，咁佢打電話嚟，話陳鍵鋒係我個仔，叫我搵佢拍廣告，我話冇問題，但太貴就唔得，就咁之嘛。
袁潔瑩：男包女得啖笑
Fanny（袁潔瑩）係識咗好耐嘅朋友，所以搵佢拍廣告，有雜誌重寫我畀錢包佢㖭！佢一路睇雜誌一路笑，重話報道嘅數字太少，我哋私下好多得意嘢，我都試過同佢以及一班朋友去日本旅行，但見到香港人就會行開啲，費事又俾傳媒攞嚟做新聞。
鄧浩光：澄清基的疑惑
鄧浩光兩年前嚟咗我公司做業務拓展經理，佢老婆最近上烹飪班，啲同學唔知佢老婆嘅身份，有同學話「死嘞，鄧浩光同顏福偉搞埋一齊呀」，佢老婆就話「鄧浩光有個女嘅喎」，我哋講番呢件事，覺得好過癮。
