樂基兒自從得到黎明公開承認身份之後，工作量已經減少，專注陪男友拍拖。因為同黎明拍拖帶挈，人氣極旺嘅樂基兒，將會踩入黎明前女友舒淇嘅家鄉台灣，喺今個星期三（十一日）幫Dior嘅春夏新裝行花生騷。無獨有偶黎明舊愛舒淇亦會喺星期五（十三日）幫另一牌子Chanel擔任嘉賓，睇嚟黎明嘅新歡舊愛屆時可能有機會喺台灣碰頭。
減少工作量
舒淇同黎明相戀七年，離離合合，但黎明從未公開承認二人關係。及至去年初，二人靜靜雞將呢段戀情畫上休止符。不過黎明火速戀上同舒淇一樣擁有性感豐唇嘅樂基兒，佢兩個如膠似漆，並迅速發展成半同居關係。原本作風大膽、坦承隆胸又拆彈嘅樂基兒為咗呢段戀情，明顯減少工作量，不過佢喺黎明嘅名氣帶挈下幫Dior行騷，以為佢會身價暴漲，但Dior公關暨傳媒經理唐健超話：「價錢不方便透露，但她的價碼不到十萬元台幣（約二萬四千港元）。」
