今個星期逛碟場時，好多碟迷都同筆者大歎「炒冷飯」；上星期本版優先預覽嘅3區《謊島叛變》係必買！而剛出嘅美版1區《怪誕屍新娘》同尼古拉斯基治《軍火之王》，亦成為碟迷「止咳藥」！可幸臨尾返咗隻3區《草蜢我們的演唱會》，估唔到做得幾好，聲畫表現唔錯，1盒三碟聽足近3個鐘，歌精舞勁，再回想上星期「叱咤」嗰班新人得獎演出！草蜢呢啲先係波嘛！
記者、攝影：朱崇德
在小記心目中，草蜢個Image唔係幾討好，甚至覺得有幾分老土！嗰個年頭真係寧願聽Beyond、達明一派、Radius啦；不過開碟一睇真係不得了，睇碟背歌名真係好似唔識得幾多首，但一播出嚟竟然首首都琅琅上口！可能我們都是這樣長大的！
話說行碟舖時，記者撞見一則笑話！好多人手執呢隻DVD時，第一個反應就係問「係咪新出㗎？」；原因喺早兩星期返咗隻《草蜢95演唱會》，孖碟22首歌；當然唔及今次玩3碟42首歌嘅《我們》咁多嘢聽啦！大家認真呀！
經典冧歌 耳熟能詳
開碟睇《我們》時，感覺真係好High，一開場就見近半個紅館嘅歌迷企晒起身跳舞，以記者睇演唱會經驗，真係好少見！儘管佢哋嘅露點雞毛打扮、Dancer玩男上男下、一傑同蘇威互咀引來種種話題，不過都唔夠開碟後嘅勁歌熱舞來得吸引，環顧香港近年樂壇，真係又有幾人可以好似佢哋咁「妖」冶、跳得勁，又唱得起呢？三碟舖排得幾好，Disc1大多收納經典靚歌，必聽有《半點心》、《原諒我是我》，想當年中學歌唱比賽，有邊個未唱過？Disc2就玩勁冧情歌，首推係《歲月燃燒》、《舊唱片》等，可惜全部唱半首，唔夠喉就去補買CD精選啦！Disc3係勁歌精選，有《嗲噢》、《三分鐘放縱》等勁歌串燒，呢Part嘅舞亦最勁，想睇勁歌熱舞者，一定要喺呢度搵！
必睇位
1﹒草蜢互咀玩裸女
呢幕係開演唱會時的城中熱話，相信現場觀眾都冇得咁前睇！雖然未見伸脷，不過兩個男人都好激吓！一智同兩裸女同台，都可以話挑戰了香港的演唱會尺度。
曲目：怎麼天生不是女人
2﹒萬人齊聲 妖～！
紅館近萬三人，喺一傑「指揮下」，一齊講了一聲「妖」！好彩萬人齊心，個個字正腔圓，否則可能有機刷新健力士世界紀錄！
曲目：萬眾期待、半點心
3﹒露點遊街 女觀眾胸襲
成晚最勁嗰件衫，係一傑件透明加紋身Look呢件，當佢行經觀眾席，有女觀眾忍唔住用兩碌「棍」喺佢心口重點部位勁磨，一傑就成身汗攬一嘢回敬，果然夠互動。
曲目：朋友
4﹒蘇威揸Fit 冧「媽女」
原來演唱會當日係蘇威同劉小慧結婚7周年紀念，所以唱《永遠愛着你》時，兩個兄弟俾佢揸Fit對住對「媽女」唱，真係冧到震！
曲目：永遠愛着你
5﹒勁歌熱舞 7分鐘
5首快歌，各唱半首！不過一氣過連住落，重要勁舞跳不停，真係幾強吓！
曲目：嗲噢、三分鐘放縱等串燒。
售賣點：DVDPro
電話:23326326
地址：旺角奶路臣街6E德發商場地庫B4舖